23 Jul Curoil i KTK ta firma MOU

Benefisio ekonómiko pa ámbos kompania

Willemstad – Djaluna último, den presensia di Minister di Desaroyo Ekonómiko, sr. Steven Martina, e kompanianan di gobièrnu Curoil i KTK a firma un ‘Memorandum of Understanding’ (MOU) ku e enfoke pa traha riba un futuro kolaborashon pa loke ta trata transporte di produkto petrolero entre Kòrsou i otro Islanan den Caribe.

Ku e eksperiensha amplio di KTK i Curoil, den e sektor di transporte marítimo i distribushon di produkto petrolero respektivamente, e partidonan ta premirá ku un futuro kolaborashon lo trese benefisio ekonómiko pa ámbos kompania. Pa KTK esaki lo nifiká un ampliashon di su portafolio di servisionan i pa Curoil esaki lo nifiká traha ku un partner stratégiko lokal den e área di servisio marítimo ku por trese aun mas efisiensia den e kompania su kadena di distribushon.

Durante e akto di firmamentu, Minister Steven Martina a ekspresá ku e ta sumamente kontentu kon nos kompanianan di gobièrnu a sa di traha huntu i komplementá otro na benefisio di trabounan ku mester keda hasí pa ku nan klientenan i Kòrsou en general. Segun Minister Martina: ” Di e forma aki nos ta dal otro stap positivo den desaroyo di Kòrsou su ekonomia”.

Riba e potrèt por mira e momentu ku sr. Yamil Lasten, direktor di Curoil, i sr. Suldric Rojer,
direktor di KTK ta firma e akuerdo. Huntu ku nan, Minister Steven Martina ku a sirbi komo
testigu durante e akto di firmamentu.