“Parke infantil na Brionplein e keda renobá”

Willemstad – Djarason último, despues di 2 luna i mei di trabounan di renobashon, den un ambiente festivo i den presensia di minister di VVRP sr. Charles Cooper i minister di Desaroyo Ekonómiko sr. Ruisandro Cijntje, Curoil a hasi apertura di e parke infantil kompletamente renobá na Brionplein.

Na 2005, en konekshon ku Curoil su di 20 aniversario, Curoil a regalá nos sentro di suidat, un parke infantil kompletamente renobá na Brionplein. E tempu ei, Federashon Otrobanda a aserká Curoil ku e deseo pa renobá e parke infantil na Brionplein kaminda nos muchanan ta bin rekreá i disfrutá huntu ku nan famia. Ku plaser Curoil a honra e petishon di Federashon Otrobanda i durante añanan a komprometé su mes pa sigui mantené i renobá e parke.

E diseño nobo di e parke e biaha aki tabata na enkargo di Playworld, un kompania merikano ku mas di 70 aña di eksperensia den diseño di parkenan infantil. Den e diseño di e parke, a tene kuenta ku diferente aspekto: ademas di integrá aspektonan di Curoil su área di negoshi, a inkluí tambe artefaktonan di hunga ku ta stimulá motoriek. Komo homenahe na Brionplein kaminda semper nos sa selebrá eventonan musikal i kultural grandi di nos pais, den e parke infantil tambe a inkluí un sekshon di músika. Por último, a renobá e flur di rùber, pa asina krea un área mas seif pa nos muchanan ku ta bishita e parke.

Durante e apertura di e parke, CEO di Curoil sr. Yamil Lasten a ekspresá Curoil su kompromiso pa sigui invertí den desaroyo di nos pais: “Curoil, komo un kompania nashonal, tin un responsabilidat sosial ku nos komunidat i nos lo sigui kontribuí ku proyektonan ku tin balor agregá pa nos komunidat. E parke infantil aki na Brionplein, ta un área kaminda diariamente muchanan di Otrobanda i di otro partinan di Kòrsou ta bin rekreá i pasa un ratu plasentero den nos sentro suidat. Nos ta orguyoso komo kompania di por a kontribuí ku esaki.”