E proyekto aki lo redusí gastunan di almasenahe di gas ku 30 mion florin riba un base anual

Willemstad – Djamars 7 di sèptèmber último, den presensia di Promé Minister señor Gilmar Pisas i Minister di Desaroyo Ekonómiko señora Ruthmilda
Larmonie – Cecilia, Curoil a inisiá di forma ofisial operashon di su LPG ISO Container Terminal ku lo fungi komo planta di almasenahe di gas. Ku inisio di e operashon di e LPG ISO Container Terminal, Curoil ta pone un paso importante den e trayekto pa sigui halsa efisiensia den e kadena energétiko di nos pais. E invershon total di e proyekto aki ta di 3 mion florin i lo redusí gastunan operashonal ku 30 mion florin riba un base anual. Durante e rekorido, Minister Pisas, Minister Larmonie – Cecilia i demas invitadonan a bishitá diferente lokalidat klave den e operashon i a risibí informashon ekstenso tokante e funshonamentu di e planta.

Despues ku na fin di desèmber 2019 e kontrato ku Refineria Isla a terminá, Curoil ku na e momento ei ya tabata importá gas for di eksterior, mester a hasi uso di e infrastruktura di Refineria di Kòrsou (RDK) i di Curaçao Refinery Utilities (CRU) pa almasená gas pa uso doméstiko i komersial. E infrastruktura di e refineria ta pone ku mester importá i almasená gas na un temperatura di -42°C. Pa transferí e gas pa tankinan di Curgas, mester hasi uso di e fasilidatnan di RDK/CRU pa keintá e gas na temperatura di ambiente. E método aki ta unu kostoso, partikularmente debí na e hecho ku aktualmente e refineria no ta den operashon i ta fungi komo un parke di almasenahe.

Den bista ku te na e momentonan aki no tin un operador pa e refineria i ku RDK riba término largu tin plan pa traha tankinan nobo pa almasenahe di gas, Curoil na 2019 a tuma e inisiativa pa bin ku un solushon a korto plaso. E meta di Curoil den esaki ta pa halsa efisiensia den e proseso di almasenahe i konsekuentemente baha gastunan di operashon. Despues di un periodo di análisis ekstensivo di diferente alternativa i den kolaborashon ku RDK/CRU, na 2020 Curoil a start ku ehekushon di e proyekto pa konstruí e LPG ISO Container Terminal. E terminal aki ta hasi posibel pa importá i almasená gas na temperatura di ambiente, eliminando e proseso kostoso di keinta gas. Alabes, ku implementashon di e proyekto aki, Curgas su operashon lo ta ménos dependiente di e infrastruktura di CRU/RDK.

Curoil su LPG ISO Container Terminal tin un total di 28 kònteiner ku ta keda yená ku 40.800 liter kada unu. Esaki ta duna Curgas un kapasidat di almasenahe di algu mas ku 1.1 mion liter, ku ta ekivalente na aproksimadamente 3 siman di almasenahe.

Curoil ta sumamente orguyoso di por a realisá e proyekto aki i alabes ta keda komprometé pa sigui buska alternativanan pa halsa efisiensia den nos kadena energétiko, den koperashon ku tur partner den e kadena, na bienestar di nos komunidat.