03 Sep Produkto di Curoil ta kuadra ku spesifikashon vigente

Curoil ta pará habrí pa un partido independiente hasi evaluashon di e kalidat di e produktonan ku e kompania ta distribuí riba merkado lokal.

Willemstad – Manera informá anteriormente, den bista di diferente alegashonnan relatá na kalidat di gasolin, Curoil a laga hasi tèstnan adishonal na laboratorionan internashonal di e gasolin ku tin aktualmente riba merkado. E resultadonan risibí, ta verifiká ku e produkto ta kuadra ku e spesifikashonnan stipulá pa gobièrnu di Kòrsou. Mirando e inkietut ku ta reina den nos komunidat tokante e kalidat di gasolin, resientemente Curoil a indiká na gobièrnu di Kòrsou ku e kompania ta pará habrí pa laga un partido independiente hasi evaluashonnan adishonal di e produktonan ku Curoil ta distribuí, pa di e forma aki kita e inkietut ku ta reina den nos komunidat.

Manera ya ta konosí, Curoil tin dos aña ta importá produkto i den e proseso aki ta mantené su mes na e normanan di kalidat stipulá pa gobièrnu di Kòrsou. Pa loke ta trata gasolin, 14 tèst ta keda regulá pa medio di un mínimo/máksimo di balor permití pa keda tèst. Curoil na su turno, ku mira riba desaroyonan riba merkado, a añadí 4 tèst adishonal.  Pues, en total 18 tèst ta keda hasí ku kada batch di gasolin ku keda importá.

Den e proseso, for di kompra te ku entrega di produkto na pòmpnan di gasolin, tin 3 diferente momento klave ku e gasolin ta keda di tèst pa laboratorionan independiente, ku ta kontrolá si e kalidat di e produkto ta kuadra ku e spesifikashonnan vigente:

1. Na momento ku karga e produkto na barku, e proveedor mester entregá un rapòrt di laboratorio indikando ku e komponentenan di e produkto ta kuadra ku e spesifikashonnan rekerí.
2. Na momento di deskargá e produkto na Kòrsou, ta kue un muestra i un laboratorio independiente ta verifiká si e komponentenan di e produkto ta den e márgen stipulá. E kontròlnan ta tuma lugá di forma imparsial dor di diferente kompanianan di inspekshon lokal (p.e. Inspecciones, Intertek i Saybolt) i e tèstnan ta keda hasí pa e laboratorio di CRU/RDK i/òf un laboratorio internashonal skohé pa e kompania di inspekshon.
3. Promé ku e produkto yega pòmp, ta bolbe kue un muestra di e produkto den tanki i e kompania di inspekshon ta verifiká e kalidat pa medio di tèstnan na laboratorio.

Pues tur produkto ku ta subi riba nos merkadonan lokal ta pasa den un proseso imparsial i strigente pa garantisá kalidat. Pa loke ta trata e gasolin ku tin aktual, a ripití e tèstnan pa ku entre otro corrosion, gum formation i oxidation stability pa asina verifiká e kalidat. Adishonalmente, Curoil a aserká 2 diferente laboratorio na Merka ku tambe a hasi tèstnan di kalidat. Tur resultado risibí ta konfirmá ku e produkto ta kuadra ku spesifikashonnan vigente.

Ku esaki, Curoil a hasi tur loke ta na su alkanse pa garantisá ku e produkto ku ta keda importá ta kuadra ku normanan stipulá pa gobièrnu. Apesar di esaki, nos ta konsiente ku ta reina un inkietut den nos komunidat pa ku e kalidat di e produkto. Pa e motibu aki, Curoil a indiká na minister ku e kompania ta pará habrí pa laga un partido independiente hasi un evaluashon adishonal di e produktonan ku e ta importá, sperando ku esaki ta kita e inkietut ku ta reina den nos komunidat.

Curoil tin un kompromiso pa sirbi nos komunidatnan di Kòrsou i Boneiru dor di garantisá suministro di produkto petrolero, i den esaki, ta kumpli na tur momento ku regla- i normanan vigente.